Di AK Woi 2024

Wen wöh i do überhaupst?

180 Leit im obastn Gremium. Des haaßt Voiversaummlung. Des san die Leit, die daunn den Präsedenten oda die Präsedentin wöhn.

Wos warat do fia mi zum tuan?

Du wöhst direkt in deina Hockn oda schickst a Kreizal mit da Post. Des aane wi des aundere host in ana Minutn erledigt. Woigeheimnis is eh kloa, kaana schauta dabei iwa die Schuita.

Wo kaunn i wöhn?

Du kaunnst in da Hockn wöhn, waunn durtn a Betriebswoisprengl eingricht is. Des is in vülen mittlaren und greßeren Fiamen so.

Waunnst am Woitog net in da Hockn sei kaunnst – weust im Urlaub bist oda grod di Hockn wechselst – kaunnst a Woikortn beauntrogn. Wia des geht? Do kriagst rechtzeitig an Schrieb vom Woibüro.

In deiner Hockn wird ka Betriebswoisprengl eingricht? Daunn wird da a Woikortn zuagschickt. Die gibst mit da Post auf oder du mochst dei Kreizal in an öffentlichen Woilokal – davon gibt‘s eh gnua.

Wea deaf iwahaupt wöhn? 

Du bist am 3. Jänner 2024 – des is da Stichtog – unsöbständig bschäftigt oda freie Dienstnehmarin oda freia Dienstnehma? Daunn bist automatisch dabei.

Du bist am 3. Jänner 2024 – eh scho wissen, des is da Stichtog – Lehrling, geringfügig bschäftigt, karenziert, Ziwü- oder Präsenzdiena oder hocknstaad? Daunn kaunnst di in die Woilistn eintrogn loss‘n. Des Woibüro von da Oaweitakaumma schickt da rechtzeitig an Schrieb.

Wia hüft da des AK Woibüro weida? 

Den wichtigsten Zund zur Woi kriagst schriftlich ins Postkastl. Des Woibüro benochrichtigt di persönlich:

• Ob du in di Woilistn kummst, wenn´st net eh automatisch dabei bist (Anfang Februar 2024).
• Wia und waunn du a Woikoatn kriagst (Anfang März 2024).
• Waunn und wo du wöhn kaunnst (Ende März 2024).

Oiso, is eh ois kloa?

Waunn net, redst mit dein Betriebsrat / Personalvertreta oda mödst di bei da AK! De Hotline is nui ans, fünfhundatans fünfhundatsiebzich.

Serwas, griaß di! Oiso, geh wöhn. Nur a stoak AK kaunn si um de Rechte in da Hockn kimman.